Hugrenningar hlaupafíkils

Reykjavík Road Runners

2008-08-21T20:52:00.001Z

Liðsmenn Reykjavík Road Runners hafa sett upp nýja síðu.

Kaupmannahafnarmaraþon 2008

2008-05-31T10:03:00.006Z

Seint ritaðar línur um Kaupmannahöfn 2008 en koma þó.
Eftir þéttar æfingar á vormánuðum var komið að því, maraþonhelgin runnin upp.
Ég, Alma og Una flugum út síðdegis á föstudegi en Pétur var þegar mættur. Alma og Una skipuðu klappliðið. Ég og Pétur vorum mjög samstíga í þjálfun og allt miðaðist við að ná markmiði ársins í Kaupmannahöfn, ná undir 3:15 sem er Boston qualification tími fyrir okkar aldurshóp. (nánar tiltekið 3:15:59)
Hittum Helgu, Svenna, Ingu og Baldur og fórum 8 saman í dinner á föstudagskvöldinu.
Náðum góðum nætursvefni og fórum svo í Expo-ið að ná í númer og mingla við hina hlauparana. Ég var líka með á planinu að kaupa nýja Garmin 405 úrið og fann það og keypti í Expo-inu eins og ég bjóst við. Við vorum mjög meðvitaðir um að labba helst ekkert á laugardeginum og ég og Pétur fórum upp á hótel síðdegis og tókum 2 tíma lúr.
Um kvöldið fórum við á sama ítalska staðinn og við fórum á í fyrra og keyptum okkur sama pastaréttinn! Snemma heim og reynt að fara snemma að sofa. Eitthvað drógst það, spenna í loftinu og ég sofnaði rúmlega miðnætti.
Mættur í morgunmat kl 07:00 og fékk nokkuð hefðbundinn morgunmat, musli og jógúrt, brauð og kaffi. Við Alma gengum svo yfir á hótelið til Péturs og Unu og vorum þar um kl 8. Ákvað að veðrið leyfði það að fara í superlight stuttbuxurnar sem ég gerði ásamt því að létta á mér eins og hægt var á salerninu.
Við Pétur röltum svo út að startsvæði, nokkur hundruð metra leið og vorum þar um 8:30, klukkutíma fyrir start. Við fórum nokkrar pissuferðir út í runna, röltum um svæðið, sötruðum High Five orku, vatn og tókum eitt gel. Það var frekar kalt og töluverður vindur. Við frestuðum því að fara úr síðbuxum og jakka þar til á síðustu stundu til að halda á okkur hita.
15 mín fyrir start fórum við úr og gengum frá farangrinum og fórum að mjaka okkur í átt að 3:15 blöðrukallinum. Á vegum hlaupsins eru hlauparar með merktar blöðrur 3:00, 3:15, 3:30 o.s.frv. sem vísa til þess að þeir muni klára á þeim tíma. Okkar áætlun var að hlaupa með 3:15 blöðrukallinum og hlaupa á jöfnum hraða alla leiðina og meta á síðasta kafla hvort eitthvað væri hægt að bæta í.
Byssan hvellur og menn mjakast af stað. Við náum nokkuð fljótt upp hraða en mikill er troðningurinn. Við héldum okkur á fyrstu kílómetrunum í kjölfari 3:15 blöðrunnar. Mér fannst vera töluvert meiri troðningur á þessum kafla en mig minnti að hefði verið í fyrra og eftir ca 6-7 km hrasaði ég, einhver fyrir aftan Pétur ýtti við honum þannig að hann fór í lappirnar á mér og ég í götuna. Ég náði að setja fyrir mig hendurnar og verja lappirnar þannig að þetta var bara smá skráma. Við sáum að troðningurinn orsakaðist að miklu leyti af hópi í kringum 3:15 gauirinn þannig að við ákváðum að færa okkur aðeins fram fyrir og var það miklu betra. Nú var planið að halda honum ca 50 metrum fyrir aftan okkur en halda jöfnu bili.

Í ca 15 km hlupum við fram á Höskuld sem var vel sprækur en sagðist hafa farið aðeins of hratt af stað og ætlaði að hægja á sér. Við litum um öxl og sáum að við vorum farnir að fjarlægjast blöðrukallinn meira en við ætluðum. Ákváðum að halda aftur að okkur en reyndin var samt önnur, við héldum áfram að fara aðeins hraðar en við höfðum ætlað okkur. Hálfmaraþon á 1:37 og við vorum báðir í fínu formi en áttum frekar erfitt með að halda aftur að okkur og vera á réttum meðalhraða. Alma og Una í klappliðinu voru ótrúlegar komu sér á milli staða hlaupandi og í taxa til að ná að sjá, mynda og hvetja okkur á sem flestum stöðum.
Annars var þetta nokkuð tíðindalítið upp fyrir 30 km og við vorum vel stemmdir og léttir á fæti. Rúmlega 30 vorum við hættir að kjafta eins mikið saman og aðeins farinn að þyngjast róðurinn og fókusinn kominn á að halda hraðanum upp frekar en að halda honum niðri.
Við gengum nokkur skref í fyrsta skipti gegnum drykkjarstöðina í 35km.
Allt í einu eins og þruma úr heiðskýru lofti í kringum ca 36-37 kemur blöðrugaurinn aðvífandi með 3:15 hjörðina með sér. Við höfðum sofnað á verðinum og hægt á okkur.
"Við hleypum honum ekki fram úr okkur!" segi ég við Pétur og spýti í lófana og fer fram fyrir hjörðina aftur. Nú þurfti ég að einbeita mér og keyra mig hart áfram, með blöðruhjörðina alveg í rassinum. Drykkjarstöð í 39 og ég hægði til að ná mér í vatn. Hjörðin náði fram úr mér þar, en ég tók aftur "sprett" og fór fram fyrir. Nú var það hafnarbakkinn og síðasti spölurinn. Alltaf eru þessir síðustu metrar aðeins lengri en maður reiknar með en ég átti þó eitthvað eftir til að keyra síðasta spölinn af krafti og keyra í gegnum þröngan ganginn að markinu með mikla hvatningu frá áhorfendum. Fór gegnum markið á byssutímanum 3:15:46 en úrið og flagan sagði 3:14:46 sem er opinberi tíminn. Markmiðinu náð!
Blöðruhjörðin kom svo rétt á eftir mér.
En hvar var Pétur? Ég gaf mér einhvern veginn að hann hefði gefið í líka þegar blöðrugaurinn kom en hann var ekki kominn. Ég beið við marklínuna og sá hann birtast fljótlega, hann var á sannfærandi hraða en greinilega á síðustu dropunum og eiginlega féll í fangið á mér um leið og hann var kominn í gegnum markið eftir að hafa tekið svakalegan endasprett. Hann jafnaði sig strax en þá áttuðum við okkur á því að hann hafði ekki stoppað úrið sitt þegar hann fór í gegn og við vissum því bara nokkurn veginn byssutímann hans sem var ca 3:16:50! Hafði hann náð 3:15:59 í flögutíma? Við þurftum að bíða í óvissu þar til næsta morgun en þá sáum við á netinu að hann hafði náð 3:15:52. Við náðum báðir markmiðinu, Boston Qualification tími!

Hlaupadagbókin

2008-04-02T09:10:00.002Z

Ég hef hafið skráningar í hlaupadagbókina á netinu og mæli ég með því fyrir alla hlaupara. Stórgott framtak, skemmtileg framsetning og mjög fróðlegt að sjá og læra af öðrum.
Hér eftir munu æfingafærslur fara í dagbókina en aðrar hugrenningar lenda hér.

Marsmaraþon

2008-03-30T10:51:00.002Z

Hljóp hálft í Marsmaraþoni FM. Markmiðið var að fara undir 1:40. Byrjaði nokkuð hratt, var kominn á 4:35 meðaltempó eftir fyrstu 5km. Hægði svo aðeins á eftir það og hélt nokkuð jöfnum hraða það sem eftir var. Mótvindur í Fossvogi á bakaleiðinni kom á óvart og var ég með smá áhyggjur af því að vera orðinn of hægur á síðasta kaflanum. Á síðasta kaflanum sem er eftir stokknum yfir Elliðaárnar sá ég að klukkan var að telja upp frá 1:39 þannig að ég tók hressilegan endasprett og klukkan sýndi 1:39:52 þegar ég fór í gegnum markið. Ég var ánægður með formið og markmið náðist.

2. páskadagur

2008-03-24T19:39:00.002Z

Fór síðdegis og hljóp nokkuð hraða 12km fyrir Kársnesið og til baka, var svo kominn í laugina kl 17:30 og var að vonast til að hitta á hlaupahópinn. Þar var ekki sála þannig að ég hélt áfram einn smá hring til viðbótar á rólegra tempói. Samtals 17 km í fínu formi.

Skírdagsskokk

2008-03-20T21:20:00.000Z

Fór rólega 18 km. Ætluðum saman ég og Pétur en hann forfallaðist. Leiðin yfir Arnarnes og fyrir Kársnes upp Fossvog og niður Kópavogsdal.

Síðdegissprettir

2008-03-19T22:24:00.000Z

Tók lítinn Gb hring (7,5km) með nokkrum sprettum. Kuldi og rok.

Langur sunnudagur

2008-03-16T13:29:00.000Z

Fór í morgun með Pétri 20 km hefðbundinn hring, fyrir Arnarnes og Kársnes, upp Fossvog, framhjá Mjódd og ÍR og niður Kópavogsdal. Tókum góðan hraðakafla í Kópavogsdalnum. Fór svo í pottinn á eftir.

Frískur á fimmtudegi

2008-03-13T23:41:00.000Z

Hljóp í kvöld 12 km fyrir Arnarnes og Kársnes og þveraði svo Kópavogshæðina til baka. Fínt og frískandi kvöldhlaup.

Lítill Gb

2008-03-11T22:44:00.000Z

tók lítinn Gb hring síðdegis, 7,5 km

Sunnudagur í Salarlaug

2008-03-09T14:36:00.000Z

Fór 17km og endaði í Salarlaug og hitti familíuna. Eftir hefðbundna byrjun fann ég fína leið uppúr Elliðaárdal eftir hlíðinni milli efra og neðra Breiðholts, skógarstígur með ágætri hækkun.

Úr kafi

2008-02-19T12:15:00.001Z

Það er nú meira hvað ég hef drekkt mér í vinnu undanfarið, hef varla litið upp og ekki hlaupið lengra en í og úr strætó. Bætti þó úr því og skellti mér stuttan Gb hring í gær. 7,5km, rólegt tempó, frekar þungur eftir hlaupaleysið undanfarið. Betur má ef duga skal.

Janúar Powerade

2008-01-11T07:31:00.000Z

Fór með Ölmu í gærkvöldi og tók þátt í Poweradehlaupi sem fer fram mánaðarlega yfir veturinn. Hlaupið frá Árbæjarlaug og farið 10 km hring meðfram Elliðaá um Elliðaárdal. Skemmtilegt hlaup, góð mæting eða um 190 manns. Ég fór þetta á rétt rúmlega 44 mín. Svo er hefð fyrir pottadýfingum á eftir þar sem mikið er skrafað.

Tíðindalausir tíu

2008-01-08T08:47:00.000Z

Fór 10km hring nokkuð hratt í gær á meðan Katrín var í fimleikum. Hálkublettir kröfðust varúðar.

20 km í góðu veðri

2008-01-05T15:46:00.000Z

Fór einn í morgun 20 km hring á þægilegum hraða, tíminn 1:45.
Var að uppgötva nýja tónlist á leiðinni, Okkervil River og Of Montreal.

Flogið í myrkri

2008-01-02T23:50:00.000Z

Fór út í kvöld í myrkri (kemur ekki á óvart) og rigningu. Tók einn 7km hring og tókst að fljúga á hausinn á blautu svelli sem leyndi á sér við innkeyrsluna hjá einhverjum bílaþvottglöðum Flatarbúa. Varð ekki meint af byltunni.
Lenti líka í öngstræti þar sem Flatirnar enda og ég hleyp venjulega því þar hefur byggingaraðili frekjast og grafið sundur göngustíginn og girt af þannig að ekki var annað til ráða en að ryðjast yfir nærliggjandi lóð og limgerði.

Gott ár að baki

2007-12-29T15:30:00.000Z

Fórum félagarnir Pétur, Lambi og ég 20 km hring frá Garðabæjarlaug. Gamalkunnur hringur fyrir Arnarnes og Kársnes, upp allan Fossvog og upp í Mjódd. Framhjá ÍR og niður allan Kópavogsdalinn og svo til baka. Við tókum að mestu rólegt hlaup og gekk vel þar til við vorum að fara undir göng inn í Kópavogsdalinn, þá lenti Pétur á svelli og flaug bókstaflega og lenti illa, sneri á sér ökklann þannig að það leit ekki vel út. Hann setti snjó í sokkinn og kældi og tókst þannig að staulast með okkur restina af leiðinni. Þrátt fyrir þetta óhapp var gott að ná einu löngu hlaupi svona í lok árs.

Markmið ársins var að hlaupa Laugaveginn og tókst það og gott betur.
Fyrsta maraþonið að baki í Kaupmannahöfn í maí, tíminn 3:36:51.
Laugavegurinn gekk vel, tíminn 6:15:54
og svo tók ég Reykjavíkurmaraþonið á massafínum tíma, 3:25:03
Í stuttu hlaupunum setti ég einnig persónuleg met með 43:23 í 10km í 1. maí hlaupi Fjölnis og 7km Icelandair hlaupið á 28:31.

Stuttur hringur eftir of langt hlé

2007-11-07T23:08:00.000Z

Vá hvað ég hef látið skólann éta frá mér tímann, hef ekki hlaupið of lengi. Skrapp út á mánudagskvöld og tók stuttan Garðabæjarhring í grenjandi rigningu. Frábært og hressandi. 7km rólega.

Heiðmörk með hindrunum

2007-10-13T13:34:00.000Z

Fór með Marteini hjólandi og hlaupahópnum upp í Heiðmörk. Lendum í sundurgröfnum göngustíg undir Reykjanesbraut og var það nokkuð klöngur að komast þar yfir. Vindur á móti hægði aðeins á Marteini sem annars stóð sig eins og hetja á nýju torfærugírahjóli.
Fórum upp að lykkju og fórum samtals um 18 km.
Annars hefur ekki verið mikið um hlaup undanfarið sökum anna í skóla sem tekur allan tíma utan vinnunnar :-|

Fyrsta vetrarhlaupið

2007-09-15T13:06:00.000Z

Ég og Pétur lögðum af stað frá Gb sundlaug kl 8 í morgun í grenjandi rigningu og roki. Hitamælirinn sýndi 3 gráður. Það dugði ekkert minna en vetrarbuxur, húfa og vettlingar. Við hlupum gamalkunnan hring út fyrir Arnarnes og Kársnes og upp allan Fossvogsdal og Elliðaárdal og efst í Seljahverfið. Þaðan stíginn milli Seljahverfis og Kópavogs, niður í Kópavogsdalinn og tókum sprett niður allan Kópavogsdalinn. Til baka fyrir Arnarnes og kringum Ásahverfið. Þetta endaði í rétt um 29 km á 2:32 sem gerir pace 5:14. Til stóð að hlaupa rólega og vorum við sífellt að minna okkur á að hægja á en einhvern veginn duttum við alltaf í þennan rythma. Þegar við vorum búnir með hálft maraþon vorum við á 1:51.

hádegishringur

2007-09-12T19:37:00.000Z

Fór með Pétri í gær rúma 11 km frá Laugardalslaug niður í Fossvogsdal og Elliðaárdal. Til baka gegnum sund eftir Langholtsvegi, yfir Austurbrún og til baka.
Ætluðum hægt, enduðum í ca 5 tempói.

Heiðmörk með hjólreiðakappa

2007-09-09T10:31:00.000Z

Fór í gær með hlaupahópnum upp að mastri í Heiðmörk. Marteinn kom með á hjóli og stóð sig eins og hetja. Smá rigning til að kæla, frábært hlaupaveður. Miðjustígur um skóginn til baka. Ágætt mæting í hlaupahópnum. Þetta endaði í 14 km hjá okkur feðgum.
Ég sé líka að ég hef ekki fært inn Heiðmerkurferð síðustasta sunnudag en þá fór við fjölskyldan öll í Heiðmörkina í sól og blíðu. Alma á fjallahjólinu með Katrínu aftan á og Marteinn á sínu hjóli. Fórum yfir Búrfellshraunið og upp að beygju og svo Vífilsstaðahlíðarstíg til baka. Garmurinn sýndi 18km.

Hvíldinni lokið

2007-08-28T23:45:00.000Z

Hvíldi í rúma viku eftir RM og hljóp svo í gær 10 km á þægilegu tempói með Gísla. Fór frá sundlauginni út á Garðaholt, niður í Hafnarfjörð og Hafnarfjarðarveginn heim.

Reykjavíkurmaraþon

2007-08-21T08:35:00.000Z

Við Alma vorum með seinni skipunum niður í bæ og vorum smá stund að finna stæði. Ég hafði sötrað einn Extreme Energy á leiðinni í bæinn og kláraði hann korter í hlaup. Við losuðum okkur við umframföt og ég ákvað að miðað við það góða veður sem var að hlaupa í hlýrabol og sá ekki eftir því. Nú var að finna Pétur og Lamba því planið var að leggja a.m.k. af stað saman. Við smokruðum okkur inn í hópinn og tróðust framar þar sem merkingar sögðu að 3:30 hlauparar ættu að staðsetja sig. Ég kom fljótlega auga á Pétur og Lamba. Á þeim slóðum voru einnig fleiri kunnugleg andlit. Gísli og Grétar voru þarna mættir. 2 mínútur í start og Alma áttaði sig á því að hún væri of mikið klædd. Hún reif sig úr langermabolnum og hnýtti hann á næsta staur. Ég kvaddi Ölmu, hún var á leið í hálft. Byssuhvellur og troðningur. Við hlupum frekar hratt af stað eins og oft er og ég sagði í gríni við strákana að við gætum a.m.k. notað Trausta Valdimarsson sem mælikvarða á það að við værum að fara of hratt þar sem hann var héri fyrir 3:15 hlaupara. Á suðurgötunni vorum að hlaupa hópi sem Trausti leiddi og vissum þá að við vorum að fara of hratt miðað við það plan sem við lögðum upp með, þ.e. að ég stefndi á að vera undir 3:30 og Pétur sagði að hann yrði ánægður með 3:45.
Við héldum þó áfram á þessum hraða. Þegar við nálguðumst Eiðistorg tók klappliðið á móti mér; Marteinn, Katrín, Mamma og Pabbi með hvatningarskilti, hróp og köll. Frábært að fá svona hvatningu! Þegar við vorum enn á sama róli og Trausti þegar við nálguðumst 10km ákváðum við Pétur að halda þessum hraða bara til gamans að sjá hversu lengi við myndum halda það út. Þetta var náttúrulega þvert á allar ráðleggingar sem segja að menn verði að passa sig á að hlaupa ekki of hratt í upphafi til að sprengja sig ekki og einnig það að skipta ekki um hest í miðri á.
Þegar við nálguðumst Kirkjusand var klappliðið mætt aftur og hvatti okkur áfram. Um svipað leyti mættum við fyrstu mönnum í hálfmaraþoninu sem voru þá búnir að taka hringinn um Eimskipssvæðið. Þvílíkur hraði á þeim!
Við notuðum svipaða taktík og í Köben þ.e. að taka gel á fyrstu drykkjarstöð og svo annarri hverri eftir það en vatnsglas á hverri stöð. Þetta kerfi virkaði fínt núna einnig. Þegar við vorum komnir á Sæbrautina aftur eftir Eimskipssvæðið fékk ég mikið endorfínrúss og þurfti að halda í við mig til að spíta ekki í. Þetta rúss kom með reglulegu millibili út allt hlaupið og hef ég aldrei upplifað annað eins. Ég hef oft fengið innspýtingu af þessu sjálfframleidda dópi en ekkert á við það sem var í þessu hlaupi.
Við Kringlumýrarbraut skildu leiðir, Lambi hélt áfram niður í miðbæ og kláraði hálfa maraþonið á flottum tíma, 1:36:50. Við hlupum nú upp Kringlumýrarbraut og austur Suðurlandsbrautina, hring um húsdýragarðinn og svo áfram út Suðurlandsbraut. Um þetta leyti var Pétur ekki lengur mér við hlið, hafði eitthvað dregist aftur úr en ég hélt áfram að hlaupa með Trausta Valdimars ásamt nokkrum öðrum. Trausti tékkaði samviskusamlega við öll kílómetramerki hvort hann væri á réttu róli miðað við armbandið sem hann var með sem útlistaði á hvaða tíma hann ætti að vera miðað við að klára á 3:15. Ég hafði reyndar prentað út svona armband einnig með 5 km millitímum en eina sem ég fékk út úr því var lærdómurinn að það borgar sig ekki að prenta þetta á bleksprautuprentara.
Inn í Elliðárdal og niður Fossvoginn. Ég þurfti að pissa en ákvað að sjá hvort það myndi líða hjá. Vildi helst ekki sleppa hópnum. Það gekk niður allan Fossvog en þegar við vorum komnir undir kirkjugarðinn fór ég út í kant og tæmdi blöðruna. Ég flýtti mér af stað aftur og hélt jöfnu bili við hópinn í nokkurn tíma en ég náði hópnum ekki aftur.
Ég hafði reiknað með því að það væri drykkjarstöð í Nauthólsvík og var því tilbúinn með gelið þegar þangað kom, tónlist og mikið fólk að hvetja okkur áfram. En ekkert vatn... hvað var að gerast? Ég hafði eitthvað misreiknað mig. Hvar var þá næsta drykkjarstöð? Ég hafði skoðað kortið og séð að þarna átti að vera húllumhæ og hafði því gefið mér að þar væri drykkjarstöð einnig. Þetta dró aðeins úr mér, ég hafði gefið mér að þarna fengi ég mér gel og ætlaði svo að taka upp leynivopnið og setja iPodinn í eyrun. Ég frestaði því þessum aðgerðum og treysti á að ekki væri langt í næstu drykkjarstöð. Hún kom í ljós þegar ég var kominn fyrir dælustöðina við gömlu Shell stöðina og þá gekk ég í fyrsta skipti gegnum drykkjarstöð. Þegar þarna var komið við sögu er ég búinn að hlaupa 30 km. Ég fékk mér langþráð gel, skellti í mig vatni, setti iPod í eyrun og hljóp af stað. Lenni Kravitz byrjaði og söng "and I'm always on the run" sem setti bros á vör. Ég var sprækur á leið út Ægissíðuna og tók fram úr einhverjum á leiðinni. Maður sá nokk hvort maður væri að taka fram úr þeim sem höfðu lagt af stað klukkan 8 eða hvort þetta voru samferðamenn. Ég var búinn að hægja eitthvað á mér og var ekki mikið að spá í tímann en var nokkuð viss um að ef ég héldi áfram á þessum dampi myndi ég klára vel undir 3:30. Þegar ég var kominn á móts við Lindarbraut búinn með ca 35 km fæ ég klapp á bakið og Pétur er mættur! Hann hafði þá greinilega haldið góðum hraða og dregið á mig. Það voru fagnaðarfundir og það var mér mikil hvatning að hitta Pétur aftur. Við hlupum samhliða að drykkjarstöðinni við Gróttu þar við tókum síðasta gelið, gengum í gegn, Pétur pissaði og svo af stað aftur. Lambi var þarna mættur til að hvetja okkur, kominn í borgaralegan klæðnað eftir hálfmaraþonið! Síðasti kaflinn var tíðindalítill utan þess að ég hljóp á einhverja konu sem var á gangi við Ánanaust. Hún gekk á miðjum gangstígnum þrátt fyrir að brautarstarfsmenn væru í kring og hlauparar á þessari leið. Hvorki mér né henni var meint af.
Þegar við komum niður í bæ voru Alma, Marteinn og Lambi mætt þar og Marteinn og Alma hlupu með okkur síðasta kílómeterinn, alveg frábær hvatning. Við Pétur vorum það vel stemmdir að við tókum endasprett út Lækjargötuna og hlupum samhliða í gegnum markið á 3:25:03.
Klappliðið var mætt og Sjöfn og Röggi einnig. Frábærar móttökur í markinu og mjög skemmtilegt hlaup að baki.
Mér leið vel á eftir, engin vanlíðan eða krampaeinkenni. Stirður í nokkra daga en ekkert meira en við var að búast. Minni harðsperrur en eftir Köben.

3:25:03

2007-08-20T21:50:00.000Z

Takmarkinu náð og gott betur í Reykjavíkurmaraþoninu. Ég setti mér markmið að ná undir 3:30 og hljóp þetta á tímanum 3:25:03

Stutt í RM

2007-08-15T22:37:00.000Z

Jæja nú er Reykjavíkurmaraþonið á laugardaginn. Síðustu æfingarnar fyrir þonið voru:

föstudagur 10.8. Yassoafbrigði kringum garð einn í Oisterwijk og var hringurin 500 metrar. Ég tók 2 hraða hringi og einn hægan, 8 sett. Fín æfing sem endaði í ca 13 km. Alma hljóp með mér og blés varla úr nös.

mánudagur 13.8.fór út og hljóp með sjónum, kringum Arnarnes og til baka meðfram Sjálandi. 40 mínútna rólegt tempó. Ca 7 km.

þriðjudagur 14.8. fór í hádeginu með Pétri 30 mínútur rólegt tempó frá Laugardal. 5,5 km.

Ég er vel stemmdur fyrir hlaupið þó að æfingar síðustu vikur hafi ekki veri með mjög skipulegum hætti. Ég stefni á að hlaupa undir 3:30.

Oisterwijkse Boschen en Vennen

2007-08-08T21:18:00.000Z

Ég fór í fyrradag skemmtilega leið um skóginn hér í Oisterwijk. Frábært svæði til að hlaupa en hitinn dró heldur úr mér. 30 stiga hiti varð til þess að ég var búinn með 4 brúsa þegar ég var rúmlega hálfnaður. Garmurinn átti erfitt með að halda sambandi við himintunglin með trén allt í kring. Hljóp í 1:45 á nokkuð hratt þannig að ég hef hlaupið tæpa 20 km.

Akrahringur

2007-08-03T19:54:00.000Z

Erum komin til Hollands á gamlar heimaslóðir í Oisterwijk. Fór í dag með Ölmu 8km hring um akrana. 25 stiga hiti og sól. Ansi skemmtilegt að koma hingað aftur og rifja upp hlaupaleiðir. Hef ekki hlaupið mikið undanfarna daga. Síðasta helgi var útilega og ekkert hlaupið. Fór svo einn Gb hring á þriðjudaginn.

Álftanes

2007-07-25T23:50:00.000Z

Fór út á Álftanes og hring um bæinn, merkilegt nokk, ég hef aldrei hlaupið þessa leið áður þó hún liggi beint við. Fór svo yfir Garðaholtið á leiðinni til baka, snerti á Hafnarfirði framhjá Hrafnistu og svo heim. Samtals 15 km á 1:20.
Hitti Gísla á leiðinni sem var á fullu á fjallahjólinu að æfa fyrir Mosfellsþríþrautina sem er helgina eftir RM, hann hélt áfram að sá fræjum hjá mér um að koma með sér. Ég neita því ekki að það kitlar.

Rigningarhringur

2007-07-23T23:50:00.000Z

Fór lítinn Garðabæjarhring í kvöld í grenjandi rigningu og hita. Vaxandi hraði og endaði á spretti. 7 km.

Hjólatúr

2007-07-23T09:55:00.000Z

Hjólaði með Marteini út í Skerjafjörð í gærkvöldi þar sem hann varð eftir. Rólega út í Skerjafjörð og hratt til baka. Fórum fyrir Arnarnes og fyrir Kársnes, samtals 12 km hjá honum og 24 km hjá mér. Velti fyrir mér á leiðinni að gaman væri að taka þátt í þríþraut einhvern daginn. Gísli ætlar víst í Mosfellsþríþraut sem er helgina eftir RM.

Heiðmörk 18 km

2007-07-21T16:55:00.000Z

Fór út í morgun með hlaupahópnum - mættum reyndar bara 3, ég Gísli og Grétar. Fórum uppí Heiðmörk með það að markmiði að hlaupa upp að mastri - sem væri ca 12 km. Gísli ákvað að halda áfram og fara í gegnum Kaldársel á leiðinni heim í Hafnarfjörð. Ég og Grétar fórum með honum upp að lykkju og svo til baka. Þetta endaði sjálfsagt nálægt 18-19 km. Í lengra lagi sem fyrsta hlaup eftir Laugaveg en erfitt að halda aftur að sér í svona góðu veðri. Fann aðeins fyrir þreytu í löppum á síðustu kílómetrunum.

Eftirþankar

2007-07-18T10:06:00.000Z

Er að drekka í mig Laugavegssögur sem Gísli er að safna saman hér.
Skemmtileg lesning og mikið hægt að læra fyrir næsta skipti.
Hef sérstaklega áhuga á réttri samsetningu eldsneytis. Ég var aðallega með gel með mér sem getur varla verið gott að taka í of miklu magni. Ég var einnig með heimalagaðar orkukúlur sem Alma gerði, með fíkjum, döðlum og fleiru. Þær eru bragðgóðar en heldur seigar til að innbyrða hratt og þurfti að tyggja mikið og drekka með til að koma niður. Ég var einnig með bita sem Gísli gaf mér og fannst mér þeir virka vel og vera lystugir.
Mér finnst áhugaverð nálgun hjá Gunnlaugi að leggja meiri áherslu á próteinríka fæðu og alvöru mat frekar en kolvetnahleðslu fyrir +5 tíma hlaup.
Ég hef verið að velta fyrir mér skómálum og eftir á að hyggja tel ég að ég hafi eytt of löngum tíma í að fara úr og í skó við nokkrar sprænur til að halda mér þurrum. Veit ekki hvað kom yfir mig þar sem ég hafði prófað að bleyta mig á æfingu og hlaupa þannig án vandamála, Trail Sensor skórnir höfðu sýnt að þeir voru fljótir að þorna. Ég er einnig á báðum áttum um það hvort ég hefði átt að skipta um skó við Bláfjallakvísl, ég var orðin nokkuð sárfættur undir það síðasta þar sem mikið af sandi var komið í skóna sem ekki var auðveld að hrista úr. Ég hefði mögulega getað komið í veg fyrir það með því að skipta um skó við Bláfjallakvísl.

Laugavegurinn 2007

2007-07-17T13:10:00.000Z

Ég vaknaði 3:20 á laugardagsmorgun, stór dagur framundan. Fór í hlaupafötin, fékk mér kornfleks með banana og rölti svo heim til Grétars þar sem Gísli ætlaði að ná í okkur. Kíktum aðeins á veðurspá meðan við biðum eftir Gísla, spáin leit vel út. Þegar einhver náungi kom hlaupandi eftir götunni hélt ég fyrst að einhver væri að bætast í hópinn á síðustu stundu en sá svo sem var að hjá sumum var enn föstudagskvöld, þessi var sjúskaður eftir næturdjamm sennilega orðinn of seinn heim...
Daginn áður vaknaði ég líka í fyrra fallinu, lagði af stað kl 6:30 með Ölmu og Hönnu áleiðis uppí Landmannalaugar en þær lögðu af stað þaðan fyrir hádegi á föstudeginum með þá áætlun að gista í skálanum við Álftavatn og helst vera að koma niður í Húsadal um svipað leyti og hlaupakappar.
Gísli mætti svo fljótlega, sperrtur af Selíni og við brunuðum í Laugardalinn.
Rúturferðin í Hrauneyjar var tíðindalítil, ég svaf meiri part leiðarinnar. Ég gekk að morgunmatnum í Hrauneyjum vísum þar sem ég hafði tekið hann út daginn áður. Fékk mér Cherioos, mjólk, musli, 2 ristabrauð með osti og marmelaði, djúsglas og kaffibolla.
Rútugarmurinn var á mörkunum að hristast í sundur á leiðinni frá Hrauneyjum upp í Laugar, greinilega ekki gerð fyrir F-vegi.
Við vorum komin tímanlega í Landmannalaugar, rétt fyrir kl 8. Ég fór strax á klósettið þar sem hafði myndast myndarleg röð og létti á mér. Nú var komin í gang reikistefna um það hvernig best væri að klæða sig. Gísli hafði verið í stuttbuxum og stuttermabol frá því um miðja nótt og var harður á því að það væri nóg. Ég fór að hans ráði enda hitinn kominn í 12 gráður fyrir kl 8 og skýjum var greinilega að létta. Ég smurði tær og nára með Bodyglide og plástraði geirvörtur. Fór í tvenna sokka sem hafði reynst mér vel á æfingum. Ég keypti Asics Gel Trail Sensor skóna viljandi aðeins við vöxt til að hlífa tám í niðurhlaupum og var hugsunin hjá mér að vega aðeins á móti því með 2 sokkapörum. Setti vatn í 4 x 150ml brúsa og var með 5 gelbréf í annari beltistöskunni og nokkra heimalagaða orkukubba í hinni. Við komum okkur fyrir við ráslínu nokkuð framarlega og biðum óþreyjufullir eftir flautinu.
Ég hafði sett upp plan sem var svona:
Hrafntinnusker - 1:15
Álftavatn - 2:30
Emstur - 4:15
Húsadalur - 5:55

Landmannalaugar-Hrafntinnusker (12 km)
Flautið kom og 136 spenntir hlauparar lögðu af stað. Ég þurfti að halda aftur af mér til að hlaupa ekki í brekkunum upp, fann að ég gat vel hlaupið en vissi að það væri óskynsamlegt. Fegurðin og útsýnið jókst eftir því sem ofar dró, ég hafði ekki farið Laugarveginn síðan ég gekk með félögum mínum á 2 dögum í kringum 1990.
Við höfðum rætt um að hlaupa saman ég Gísli og Grétar, a.m.k. framan af og hitti ég fljótlega á Gísla eftir menn höfðu raðað aðeins eftir startið. Ég þokaðist þó eitthvað framar án þess að hafa planað það neitt sérstaklega og Grétar sá ég ekki fyrr en í markinu. Svenni hafði planað að vera aðeins hægar þannig að ég sá ekkert af honum heldur.
Kaflinn að Hrafntinnuskeri var skemmtilegur og leið hraðar en ég átti von á. Ég sá fljótlega aftan á Dag Egons ákvað að halda mig í námundan við hann. Þrátt fyrir að ég væri töluvert að halda í við mig þá var ég allt í einu kominn í Hrafntinnusker á tímanum 1:09, 6 mínútum á undan áætlun. Ég fyllti á, þó ég væri með tvo af fjórum brúsum enn fulla, fékk mér banana og hélt áfram för.

Hrafntinnusker-Álftavatn (12 km)
Leiðin frá Hrafntinnuskeri að Álftavatni leið einnig hratt. Mér fannst enn að ég þyrfti aðeins að halda aftur að mér. Var með það í huga að ég hafði komið á undan áætlun í Hrafntinnusker og ég væri því mögulega að fara of hratt. Ég reyndi að spara mig á leið upp brekkur en hljóp iðulega niður þær. Áður en varði var ég kominn að Jökultungunum og útsýni yfir Álftavatnið blasti við. Efst í brekkunni var starfsmaður hlaupsins sem varaði hlaupara við mikilli lausamöl og skornum stígum. Ég hljóp niður Tungurnar og mér fannst ég búa vel að góðum brekkuæfingum á Esju og Darra. Ég stiklaði svo yfir Grashagahvísl á stiga studdur af starfsmanni og hljóp á góðum hraða restina af leiðinni að Álftavatni. Tíminn í Álftavatni 2:20. Enn var ég með hálffulla brúsa en fyllti þó á og fékk mér banana. Ég tel mig hafa verið að drekka nóg og tók gelbréf á ca 30-45 mín fresti ásamt því að borða orkukubba.

Álftavatn - Emstrur (15 km)
Fljótlega eftir Álftavatn kom ég að polli sem mér tókst ekki að stikla á þurru og fór því úr skónum og óð berfættur. Fór einnig úr skónum við Bratthálshvísl sem er skömmu síðar. Veit ekki hvers vegna ég ákvað þetta þar sem ég hafði prófað á æfingum að vaða ár og hlaupa síðan í skónum og það hafði ekki verið neitt mál. Auk þess var stutt í Bláfjallahvísl þar sem ég hafði möguleika á að skipta um skó. Þetta er lærdómur fyrir næsta ár, ekkert þurrsokkapjatt. Við Bláfjallahvíslina voru seglstígvél til taks og aðstoð frá starfsmönnum hlaupsins við að komast yfir en þar biðu pinklar þeirra sem höfðu hug á að endurskipuleggja sig fyrir seinni hlutann. Ég fór í pokann minn, náði mér í nokkur gel í viðbót og bætti vatni í brúsa (sem var óþarfi þar sem drykkjarstöð var stuttu seinna á sandinum). Ég var með aukaskó en ákvað að nota þá ekki þar sem mér leið ágætlega í Trail Sensor skónum. Á pinklinum fann ég líka hvetjandi skilaboð frá Ölmu sem greinilega var farin hjá fyrr um daginn.
Ég brunaði af stað og sóttist ferðin yfir sandana hratt, stoppaði aðeins í drykkjarstöðinni og fékk mér banana. Ég hljóp um tíma með Svisslendingi sem var að hlaupa í annað sinn Laugarveginn, hafði komið áður fyrir fimm árum. Hann var mjög ánægður með hlaupið og þá sérstaklega hversu fáir væru að hlaupa. Hann var að bera þetta saman við Swiss Alpine Marathon sem er 78km hlaup sem hann tók einhvern tíma þátt í. Þar eru mörg þúsund keppendur og oft erfitt um vik að hrófla eitthvað við röð keppenda á þröngum stígum.

Mér fannst spottinn eftir Hattfellið aðeins lengri en ég átti von á og var farinn að lengja eftir Emstruskálanum. Hann kom svo í ljós og þar hitti ég fyrir Ölmu og Hönnu á leið niður brekkuna að skálanum. Það urðu fagnaðarfundir og ég stoppaði aðeins í smá spjall og myndatöku. Þær höfðu átt góða ferð og voru í fínu formi.
Tíminn í Emstruskála, 4:10 eða 5 mínútum á undan áætlun.
Ég bætti á brúsa, fékk mér banana og hélt áfram. Ætlaði að reyna að halda áfram í Dag sem ég hafði haft fyrir framan mig megnið af leiðinni.

Emstrur-Þórsmörk (15 km)
Ég brunaði niður sandbrekkuna að Fremri-Emstruá og fyllti skóna af möl sem ég neyddist til að tæma neðst í brekkunni. Hélt svo áfram en eitthvað var farið að draga úr hraðanum hjá mér. Ég hljóp alltaf nema upp brekkurnar en hægar en áður. Ég fann einnig að ef einhver ófæra var á leiðinni þurfti ég að hægja meira á mér og vanda mig meira en áður, þreyta farin að segja til sín. Fauskatorfurnar tóku langan tíma og var ég lengi vel einn á ferð. Sá alltaf í Dag og einhverja tvo í viðbót en náði ekki að stytta á milli okkar heldur missti ég þá lengra frá mér. Ég passaði mig að drekka og fékk mér gel með súkkulaðibragði sem bragðaðist eins og Royal búðingur. Þetta var sennilega skásta bragðið sem ég gat boðið mér þegar hér var komið. Í einni brekkunni flaug mér í hug að þetta væri kannski Kápan margumtalaða en sá á garminum að það gæti ekki verið, það var enn of langt í mark. Enda kom Kápan ógurlega í ljós stuttu síðar þar sem ég sá í fjarska langan stíg með nokkrum hlaupurum á hægu rölti upp á við. Ég stoppaði við drykkjarstöðina rétt á undan Kápunni og þar eins og annars staðar voru starfsmenn einstaklega liðlegir. Ég held þó að þarna hafi þeir sinnt okkur hlaupurum sérstaklega vel, þeir tóku brúsana úr beltinu hjá mér og fylltu á þá. Lét mig einnig fá Powerade í einn brúsann sem ég hafði reyndar enga þörf fyrir. Ég reyndi að fá mér Snickersbita sem voru í boði þar en skyrpti því fljótt út úr mér - það virkaði ekki fyrir mig. Ég gekk af stað upp Kápuna og hljóp svo yfir hana á þegar hún varð nægilega aflíðandi. Á leiðinni niður var göngufólk að vara við stígnum þar sem hann var í raun lausamöl ofan á brattri klöpp og leiðbeindu þeir mér að fara frekar við hlið stígsins á klöppinni þar sem ekki var lausamöl. Seinna komst ég að því að margir hefði dottið á þessari leið og mér skilst að hlaupari frá Litháen sem endaði í þriðja sæti hefði dottið ansi illa og komið alblóðugur í mark.
Eftir Kápuna er Þröngáin og þar var kaðall strengdur yfir og starfsmenn sem aðstoðuðu hlauparana yfir. Skórnir fylltust af möl í þeirri yfirgöngu og ég neyddist til að tæma þá eftir ánna enda var ég orðinn frekar sárfættur. Ég gekk svo upp brekkuna inn í skóginn og hljóp svo af stað aftur. Ég hélt einhvern veginn að nú væri ég kominn í skóginn sem gengið er niður í Húsadal á leiðinni úr Langadal en þetta var þó allt ókunnuglegt. Ég sá fljótt að þetta var misskilningur og hélt bara áfram eftir fremsta megni, þreyta í lærum og fótum farin að segja verulega til sín. Loks var skógurinn kunnuglegur og þá vissi ég að lítið væri eftir, þegar hér var komið við sögu hafði ég stillt garminn á að sýna mér aðeins heildartímann, var ekkert að angra mig á því hvað væri mikið eða lítið eftir. Ég hljóp svo síðasta spölinn að markinu og sá þar krakkana, Martein og Katrínu bíða eftir mér og hlaupa með mér síðustu metrana.

Markklukkan sýndi 06:15:54.

Í markinu voru frábærar móttökur, teppi, heit súpa, súkkulaði og ávextir. Marteinn og Katrin, Sjöfn og Röggi, Signý og krakkarnir höfðu öll komið til að fagna hetjunum.
Gísli kom svo fljótlega á eftir mér (6:21) og Grétar skömmu síðar (6:33). Garðabæjarsveitin stóð sig sem sagt með prýði!
Sveinn lenti í erfiðleikum á síðasta kaflanum vegna mikilla krampa sem hann tókst ekki að losa sig við og gekk því megnið að þeirri leið. Hann kom í mark á 7:58.

Þetta hlaup var frábær upplifun og ég var mjög ánægður með árangurinn. Veður og aðstæður eins og best verður á kosið, allt skipulag var til fyrirmyndar og það var mjög hvetjandi og skemmtilegt að mæta eða fara hjá göngufólki sem yfirleitt hrópaði hvatningarorð og klöppuðu.
Það var mjög gaman að ná að tvinna saman göngu hjá Ölmu, hlaup hjá okkur og útilegu með fjölskyldunni. Eftir heita sturtu, pott, grillmat, verðlaunaafhendingu og tilheyrandi fórum við yfir í Bása þar sem tjaldið beið okkar. Settum þar upp aðra grillveislu og fögnuðum frábærum Laugarvegi.
Ég var að vonum nokkuð stirður eftir þetta en leið vel að öðru leyti. Hafði ágæta matarlist og borðaði vel strax á eftir og um kvöldið. Harðsperrur minniháttar og ekkert í líkingu við það sem ég fékk eftir Köben.

Síðasta hlaup fyrir Laugarveg

2007-07-11T00:25:00.000Z

Ætlaði með hlaupahópnum en mætti einn. Fór lítinn Garðabæjarhring í rólegheitum. ca 7km, 45 mín.
Laugavegurinn á laugadaginn!

Hlaup í Aðalvík

2007-07-09T23:36:00.000Z

Er nýkominn frá Aðalvík þar sem við vorum í 2 vikur. Þar eru fínustu aðstæður til að æfa fyrir Laugaveginn og var fjallið Darri mikið notað. Fjallið afmarkar Aðalvík frá Ísafjarðardjúpi að vestanverðu. Á fjallinu eru rústir af ratsjárstöð síðan í seinna stríði. Frá Sæbóli er brattur stígur þráðbeint upp fjallshlíðina upp í 400 metra hæð en frá Aðalvíkurbrún fjallsins liggur gamall vegur yfir að brúninni Ísafjarðardjúpsmegin og hækkar þar upp í um 500 metra hæð en þar eru einmitt umræddar rústir og gamlar loftvarnarbyssur.
Neðangreind hlaup eru öll frá Þverdal.

24.6. hljóp á Darra, út að byssum og til baka. Svartaþoka uppi á fjallinu sem gerði hlaupið mjög sérstakt. 10 km, 500m hækkun, 1:30.

25.6. hljóp til Hesteyrar og til baka. Frábært veður. Skar hlíðina upp Staðardal og slapp þannig við mýri á leiðinni til Hesteyrar. Hitti fyrir vel klyfjaðan gönguhóp efst við brún Staðardals sem voru mjög undrandi á að sjá léttklæddan hlaupara á skokki uppi á heiði. Ég fór úr skónum og óð Sléttuánna berfættur en lenti svo í mýri nokkur hundruð metrum seinna þar sem ég rennblotnaði. Nýju skórnir reyndust vel og bleytan angraði mig ekki, fannst þeir nokkuð fljótir að þorna. Kom niður á eyrarnar hjá Hesteyri og fór strax niður í fjöru til að forðast mýrarnar en fór of fljótt úr fjörunni aftur þannig að ég fékk smá skammt af mýri. Hljóp út að læknishúsinu og fyllti á brúsana í læknum þar áður en ég sneri við. Á bakaleiðinni var ég reynslunni ríkari og tók alla fjöruna frá Hesteyri að brekkunni þar sem stígurinn byrjar og slapp þannig við mýrina. Hljóp Sléttuheiðina hratt, sleppti því að fara úr skónum yfir ána þar sem ég var hvort eð er orðinn blautur. Skóskíðaði svo niður skaflinn efst í Staðardalnum og tók stíginn til baka framhjá Staðarkirkju. Slatti af mýri á þeirri leið. Gekk fram á gönguhópinn aftur sem voru nú komin rétt fram hjá Staðarkirkju.
Endaði í Þverdal á tímanum 3:30 og garmurinn sýndi rúmlega 26 km.

28.6. hljóp á Darra með Ölmu, út að byssum og
til baka. Ekki ský á himni og útsýni í allar áttir. 10 km, 500m hækkun.

30.6. hljóp uppá brún á Darra og til baka. Fór hratt, tíminn 54 mínútur. 7 km, hækkun 400m.

30.6. hljóp uppá brún á Darra og til baka. Fór hratt, tíminn 54 mínútur. 7 km, hækkun 400m.

1.7. Fjölskylduganga á Darra, upp á brún og til baka. Ég og Alma, Marteinn 8 ára og Katrín 4ra ára.

2.7. Strand-Yasso. Þverdalssandurinn er 400 metra langur og því upplagður í Strand-Yasso. Hljóp 2 ferðir hratt og eina hægt - 10 sett. Semsagt heill Yasso. Alma kom og hljóp með mér. Það tók á að hlaupa í sandinum og ég fann smá eftirköst í kálfum og hnjám daginn eftir.

5.7. hljóp á Darra, út að byssum og til baka. Ég hafði heyrt af hlaupagarpi sem hafði farið "frá skemmudyrum" að byssum á 39 mínútum og þurfti ég náttúrulega að kanna hvort ég gæti ekki bætt það. Ég vissi ekki hvaða skemmudyr væri um að ræða þannig að ég mældi þetta því frá fjörunni. Ég fór frá fjöru að byssum á 29 mínútum og var ánægður með. Tími frá Þverdal í Þverdal 1:10.

Hraður 9 km

2007-06-22T00:42:00.000Z

Mikið að gera í vinnu og skipulagi síðustu daga fyrir frí þannig að ég missti af Esju í gær og Yasso í dag :-( Skrapp þó út og tók 9 hraðan hring hér í Gb. Mun svo vinna upp Esjutapið á næstu dögum í Aðalvíkinni þar sem Darrinn er alveg snilldar fjall fyrir fjallahlaupaæfingar með stíg sem liggur því sem næst beint upp hlíðina eftir gömlum vegi og járnbrautarteinum frá stríðsárunum. Hljóp þetta í fyrra og fékk þá hressilegar harðsperrur eftir niðurhlaupið.
Nú er planið að taka nokkur Darrahlaup í fríinu auk einhverra blöndu af fjörusprettum og melaskokki. Ætli þetta verði ekki síðasta færsla þar til eftir 6 júlí.

Þjóðvegur 1

2007-06-20T11:49:00.000Z

Var í veiði í gær í Norðurá og notaði tækifæri í veiðihléi yfir miðjan daginn og skokkaði aðeins. Fann leifar af gamla þjóðveginum norður sem liggur að miklu leyti meðfram Norðurá og hljóp eftir honum, frábær leið sem leiddi mig meðal annars framhjá Laxfossi. Hólar og hæðir, skógar og melar. Endaði í 12km á 6 í tempó.

Þjóðhátíðarskokk

2007-06-17T23:00:00.000Z

Fór snemma í morgun uppí Heiðmörk, yfir Búrfellshraun, eftir reiðstíg út á Hjallaflatir, yfir Vífilsstaðahlíðarbrekkuna og eftir hlíðarstígnum til baka. Fór aftur uppá hlíðina eftir línuveginum, eftir stígnum efst í hlíðinni og niður eftir honum. Endaði svo með einum hring um Vífilsstaðavatn. Samtals 22km í hita og góðu veðri. Vígði nýja Asics offroad skó (Asics Gel-Trail Sensor WR) og var ánægður með þá.

Mjög léttir fyrir offroad skó - jafn þungir og Nimbus VII skórnir sem kominn er tími á að leggja eftir 840 km notkun. Ég fékk skóna í Flexor og fékk fína þjónustu. Fékk 2 pör að láni sem ég var að vandræðast með að velja á milli. Hitt parið var með Gore-tex sem ég ákvað að myndi ekki henta mér.

Yasso

2007-06-14T23:45:00.000Z

Fór síðdegis út í Krika með nokkrum félögum úr hlaupahópnum. Ég hljóp þar 10 Yassospretti(800m spretti með 400m rólegum hring á milli), hvern á rólinu 3:15-3:25. Endaði svo á að taka 400 sprett með Bjarnsteini. Samtals hafa þetta verið ca 17km með hlaupi til og frá Kaplakrika.

Fjölskylduferð á Esjuna

2007-06-13T21:24:00.000Z

Fórum fjölskyldan að Esjurótum þar sem ég hljóp af stað og þau gengu á eftir mér. Ég rétt missti af félögunum í hlaupahópnum og var að vonast til að draga á þá á leiðinni. Fór brattari leiðina beint upp að Steini og náði þangað á 28:55. Ég sá félagana aldrei, þeir fóru greinilega eystri leiðina. Ég hljóp svo niður aftur og hitti á Ölmu, Martein og Katrínu við stígamótin. Alma sagðist hafa séð Grétar og Gísla á harðahlaupum niður 5 mínútum á undan mér. Við gengum svo aftur áleiðis upp eftir eystri leiðinni nokkurn spöl, tókum smá pásu og hlupum svo öll saman niður.

Vífilsstaðahlíð í blíðu

2007-06-12T22:46:00.000Z

Ætlaði út síðdegis í gær en ílengdist í vinnu fram á kvöld þannig að ekkert varð úr. Ég fór í kvöld yfir Flatirnar uppí Vífilsstaðahíð og tók einn hring um skógarstígana og uppá hlíðina. Endaði í 12 km á ca 5 í tempo. Hækkun ca 100 m.

Selvogsgata hraðferð

2007-06-10T23:40:00.000Z

Fór í gær með vinnufélögum Ölmu til að ganga Selvogsgötu. Ég og Svenni mágur höfðum ákveðið að þetta væri kjörið tækifæri til æfingar fyrir Laugarveginn og mættum með í hlaupagallanum. Við lögðum upp frá Bláfjallavegi (kannski heitir hann eitthvað annað...) og var leiðin á brattan til að byrja með upp í Grindarskörðin. Leiðin var í bland eins og malbikuð (í þörf fyrir ofaníburð) þar sem hraunhellan var það slétt og mosinn eyddur af henni og var leiðin þannig mjög greinileg og svo grýttir stígar inn á milli. Á seinni hluta leiðar voru það stundum ógreinilegri stígar, melar, hraunhellur og moldarstígar. Leiðin var mjög skemmtileg en krefjandi þannig að maður þurfti að hugsa um hvert skref. Mæli ekki með því að hlaupa þetta í götuhlaupaskóm eins og við gerðum, ég missteig mig 2x á hvorum fæti og fann eymsli í öklum samhliða því.
Við vorum komnir að fjallsbrún yfir Heiðarvatni á 1:45 samtals ca 16 km. Við fórum niður í rútu, smá pása og banani og héldum svo af stað aftur á móti gönguhópnum. Hittum þau fyrir á miðri leið og gengum svo með þeim aðeins aðra leið en við höfðum hlaupið. Við enduðum á því að hlaupa 25 km og ganga 6 km til viðbótar.
Ég ætla að kanna úrval af fjallahlaupaskóm í næstu viku.

Mosfellsbær - Garðabær

2007-06-07T23:02:00.000Z

Notaði tækifærið kvöld þar sem við vorum stödd í Mosfellsbæ og hljóp þaðan og heim. Garmurinn sýndi 20km. Skemmtileg leið meðfram sjónum úr Mos og inn í Grafarvog.

Fyrsta Esjuhlaupið

2007-06-06T21:50:00.000Z

Jæja þá er fyrsta Esjuhlaupi í Laugavegsæfingaprógrammi lokið. Ég fór með Pétri og Grétari nú í kvöld. Rigning og rok hefur leikið við okkur í dag þannig að þetta leit ekki út fyrir að verða spennandi. Þetta var vissulega blautt en það hafði eitthvað lægt eða áttin þannig að vindur kom ekki að sök. Þetta var þrusugaman, ég hljóp upp að Steini á 32 mínútum sléttum, stoppaði í 1,5 mín í piss og vökvun. Þurfti að fara varlega í drullunni á stígunum en endaði niðri á plani á 56 mínútum og er ánægður með það. Ég var ánægður með formið, hljóp alla leið, en svo kemur væntanlega í ljós á morgun hvort lappirnar verði jafn ánægðar þá.

Morgunskokk í roki

2007-06-06T14:10:00.000Z

Tók lítinn Garðabæjarhring í morgun, 7,5km, með Martein á hjóli með mér. Strekkingsvindur, rólegt tempó.

Grenjandi rok

2007-06-05T11:40:00.000Z

Fór yfir Flatirnar og uppí Vífilsstaðahlíð í gærkvöldi. Hljóp hlíðina á enda, efri skógarstíg á leið uppeftir og neðri stíg til baka. Grenjandi rigning og rok. Fínt hlaup á rólegu tempói, endaði í 15,5km. Hækkun ca 100m.

Heiðmörk í roki

2007-06-02T23:32:00.000Z

Ég og Grétar fórum af stað frá lauginni í strekkingsvindi í morgun kl 9 áleiðis uppí Heiðmörk. Við tókum grasið meðfram læknum yfir Flatirnar og svo stíginn yfir Búrfellshraunið upp að mastri. Þaðan tókum við reiðstíginn upp í Hjalladal og svo þaðan til baka eftir veginum yfir brekkuna góðu niður í Vífilsstaðahlíðina. Stígurinn meðfram hlíðinni til baka. Grétar kynnti mig fyrir smá tilbreytingu sem var aðeins ofar í hlíðinni, leið sem ég hafði ekki farið áður. Mjög skemmtileg leið sem minnti á skógarstígana í Hollandi fyrir utan hvað þessi er hæðóttur. Eftir Vífilsstaðahlíðina tókum við einn hring um Vífilsstaðavatnið til að lengja þetta aðeins. Sama leið til baka yfir Flatirnar og við enduðum í 20,5km hjá lauginni. Þetta var þægilegt tempó, héldum 6 mín/km. Hækkun um 110 m. frá laug að efsta punkti leiðar.

Yassodagur

2007-06-01T09:10:00.000Z

Ég hljóp í gær með Grétari og Gunnari úr skokkhópnum út á hlaupabrautina í Krikanum þar sem við tókum nokkra Yasso spretti. Ég og Grétar tókum 7 x 3:30 spretti í roki og hita.
Þar sem við ætlum báðir Laugaveginn í júlí ræddum við aðeins æfingafyrirkomulag og töluðum um að væntanlega væri vit í að lengja hvert skipti sem maður hleypur frekar en að fjölga skiptum. Einnig þörf á að einbeita sér að því að finna hlaupaleiðir í möl og utanvega auk þess að bæta við brekkuhlaupum.

Sumarið er komið

2007-05-30T09:50:00.001Z

Skrapp út í gærkvöldi og hlóp lítinn Garðabæjarhring ásamt Arnarnesi samtals rúmlega 10km. Var í fínu formi en fann eitthvað aðeins fyrir vöðvum í lærum sem ég tengi við eftirköst síðan í Köben, ekkert sem angraði mig þó. Ætlaði að fara hægt og rólega en erfitt að halda aftur að sér í svona frábæru veðri, kláraði hringinn á um 52 mín.
Frábært að fara út kl 22:30 og hlaupa á stuttbuxum og björtu veðri! Sumarið er komið.

Myndir frá Kaupmannahöfn

2007-05-29T20:57:00.001Z

Rakst á þessar myndir frá maraþoninu í Kaupmannahöfn. Mjög flottar!

Stóðst ekki mátið

2007-05-27T10:37:00.000Z

Skrapp út og hljóp 6 km mjög rólega. Fann aðeins fyrir harðsperrum ennþá en það angraði mig ekki. Frábært að fara í gang aftur!

Rautt eða svart

2007-05-26T14:45:00.000Z

Af hverju ætli hlaupa og hjólabuxur séu alltaf svartar?

6 dagar frá þoninu

2007-05-26T11:22:00.000Z

Nú eru 6 dagar frá hlaupinu langa í Köben. Ég var vel lemstraður í vöðvum síðdegis eftir hlaupið en ekki beint þreyttur af orkuleysi. Á mánudaginn var ég farinn að jafna mig aðeins en gekk þó enn hálf einkennilega. Á þriðjudag og miðvikudag var ég farinn að geta gengið niður tröppur án teljandi sársauka og var nokkuð brattur. Á fimmtudaginn og í gær var eins og harðsperrurnar væru að aukast aftur en aðeins öðruvísi verkur heldur en í upphafi vikunnar. Þetta er svo að dvína í dag. Ég ætlaði að hlaupa eitthvað stutt í dag til að koma mér í gang en held ég hvíli í 1-2 daga enn. Fer kannski út að hjóla til að hreyfa aðeins vöðvana.
Eftirköstin hafa nær eingöngu verið sem verkir í vöðvum framan á lærum. Ég fékk blöðrur á innanverðu tábergi sem ég kenni nýlegum skóm um. Ég fékk mér NB835 skó 2 vikum fyrir Köben og var búinn að hlaupa lengst ca 12 km á þeim. Hefði þurft að venjast þeim aðeins betur. Einhverjar smá blöðrur framan á tær líka sem angra mig ekkert.

Leiðin í Köben

2007-05-24T17:15:00.000Z

Þetta er GPS track eftir hlaupið í Köben

Maraþon í Kaupmannahöfn

2007-05-23T17:24:00.000Z

Fyrsta Maraþonið mitt að baki!
Eftir nokkrar vangaveltur ákvað ég með 10 daga fyrirvara að skella mér í hlaupið langa í Kaupmannahöfn. Pétur hafði bókað flug og skráð sig í hlaupið fyrir einhverjum vikum og það var ómögulegt að láta hann fara einan og klára fyrsta maraþonið á undan mér. Lambi ákvað svo að taka kæruleysið á þetta og skella sér þegar ég sagði honum að ég væri búinn að skrá mig.
Þetta var mission ferð, út síðdegis á laugardegi, hlaupið á sunnudegi og heim á mánudagsmorgni. Skv. ráðgjöf áttum við að reyna að leiða hugan að einhverju öðru en hlaupinu kvöldið áður, yeah right, það var ekki séns. Við spáðum og spegúleruðum, vorum með fangið fullt af promo stöffi frá Glitni sem fylgdi með númerunum. Það tók langan tíma að sofna á laugardagskvöldinu.
Við vöknuðum 6:45 og vorum mættir í morgunmat á hótelinu kl 7. Kornfleks og ristabrauð. Vatn og appelsínusafi. Ég var ekkert smeykur við að borða mikið, hef góða reynslu af því fyrir löng hlaup, enda voru 2,5 tímar enn í startið.
Við fórum svo upp á herbergi og komum okkur í gírinn. Smurðum tær, handakrika, geirvörtur og pung með bodyglide til að hamla núningi. Eyddum smá tíma í að festa orkugel í buxnastrenginn með frönskum rennilás. (eftir á að hyggja hefði doubletape dugað til þess). Klósettferðir til að reyna að tæma allt. Hefði verið betra að klára þær áður en við festum gelið í buxnastrenginn.
Við vorum komnir út rúmlega 8 og röltum niður að startsvæðinu. Það veitti ekkert af því að vera tímanlega, ágætt að hafa smá tíma til að átta sig á aðstæðum. Við vorum í síðbuxum og jakka yfir hlaupafötin til að halda okkur heitum og vorum með tösku fyrir smá farangur sem við gátum geymd á afhólfuðum svæðum. Ég var þar með recovery stuff sem ég hef góða reynslu af eftir langhlaup. Ég sötraði á orkudrykk klukkutímann fyrir hlaupið til að eiga orkuboost í upphafi. Ég fór á klósettið aftur, náði að tæma alveg í þetta skiptið, ómögulegt að þurfa að finna sér kamar í miðju hlaupi. Við tókum svo 2 gelbréf rétt fyrir hlaupið ásamt vatnsglasi.
Við fórum svo "að ráslínunni" ef hægt er að tala um það þegar á sjöunda þúsund manns koma sér fyrir í hóp til að hlaupa af stað. Við staðsettum okkur rétt fyrir aftan héra sem voru með blöðrur sem á stóð 3:30 sem þýðir að þeir ætli sér að halda jöfnum hraða út hlaupið og klára á 3 tímum og 30 mínútum. Planið okkar var að vera á ca 5:10 í hraða (þ.e. 5 mínútur með hvern kílómeter) fyrstu 20 km og reyna svo að bæta í eftir það ef við ættum fyrir því. Mörgum hættir til að fara of geyst í upphafi og vera svo í tómu basli með síðustu kílómetrana. Við vildum reyna að komast hjá því.
Við héldum þessum hraða fyrstu kílómetrana en vorum farnir að auka aðeins hraðann smátt og smátt og vorum komnir í 5 í meðalhraða þegar við vorum hálfnaðir.
Við vorum hver um sig með 6 gelbréf með okkur og vorum búnir að ákveða að taka eitt bréf á fyrstu drykkjarstöð og svo á annarri hvorri stöð eftir það. Þetta yrði því á ca hálftíma fresti. Þetta plan gekk eftir og fundum ekki fyrir orkuskorti allt hlaupið.
Eftir nokkra kílómetra þurfti Pétur að pissa og við hinir fylgdum með. Hjarðhegðun fram í fingurgóma. Við beygðum útaf og pissuðum í einhverju húsaskoti. Það voru menn pissandi í öðru hverju horni þannig að við gerðum bara eins. Í miðjum klíðum opnast hurðin og kona ein með barnavagn sem átti sér einskis ills von opnar útidyrnar sínar og hittir þar Lamba í óðaönn að pissa á dyrnar. Við vorum fljótir að girða okkur og hlupum flissandi í burtu eins og smástrákar eftir prakkarastrik.
Þegar við vorum að nálgast 20 km hittum við Gísla þjálfara úr Garðabæjarhópnum. Hann bar sig vel þrátt fyrir meiðsl sem hann hefur verið að glíma við í einhverjar vikur. Við höfðum aukið hraðan smátt og smátt og vorum komnir í 5 í kringum 25km. Við vorum farnir að finna vel fyrir hita og svitnuðum vel, tókum vatnsglas á hverri drykkjarstöð og gel á annari hverri. Eitthvað sem hafði angrað mig í öðrum skónum ágerðist og ég ákvað að athuga málið í kringum 27km, stoppaði og fór úr skónum. Ekkert var þar að sjá þannig að ég hélt bara áfram og leiddi þetta hjá mér. Ég kenni því um að ég hafi notað frekar nýja skó í hlaupið sem ég hafði ekki notað í lengri vegalengdir áður.
Lambi sagði mér þá að hann væri farinn að finna verki í fæti sem hann gæti ekki alveg leitt hjá sér og ætlaði að hægja aðeins á sér. Við Pétur héldum því tveir áfram á svipuðum hraða og áður. Í 35km var farið að draga aðeins af okkur, Pétur talaði um að hann fyndi ekki fyrir löppunum og ég fann hressilega fyrir áreynslunni framan á lærvöðvum. Við vorum þó ekki orkulausir og á síðustu drykkjarstöð í 39,2km tók ég hálft gelbréf sem sjálfsagt var óþarfi. Ég lenti aldrei á margumtöluðum "vegg" sem menn segjast stundum lenda á á bilinu 30-40 km og þakka ég það stöðugri gelbréfainntöku allan tímann.
40 km skiltið kom og þá hugsaði ég að þetta væri nú ansi stutt eftir. En þessir síðustu 2195 metrar voru helv. erfiðir. Eftir 42 km þá eru meira að segja erfiðir 195 metrar eftir!
Við Pétur fórum samhliða í gegnum markið alveg að rifna úr ánægju og stolti á tímanum 3:36:51. Lambi kom svo fljótlega á eftir okkur á tímanum 3:51:20 þrátt fyrir meiðsl. Þetta var frábært hlaup í alla staði og meiriháttar upplifun sem fyrsta maraþon. Ég held að þetta hafi líka verið það erfiðasta sem ég hef gert.

Við eyddum smá tíma á marksvæðinu, hringdum út og suður til að monta okkur og spjölluðum við nokkra landa í Glitnistjaldinu. Nóg var að borða og drekka af orkuríkum og endurnærandi mat og drykk.
Eftir að hafa svo farið uppá hótel í sturtu þá röltum við Strikið og dóluðum þar fram á kvöld. Kaffi, nokkrir bjórar og góður matur. Við sofnuðum svo frekar snemma um kvöldið.